The various facilities grouped inside the Semipalatinsk Test Site 10 page

Date: 2015-10-07; view: 404.

Біз тек осылай еткенде ғана тұрғын үй жағдайын жақсартып, азаматтардың өз мүлкін сақтауға жауапкершілігін жоғарылата аламыз.

2.6. Сапалы ауыз су

Қазақстандықтарды сапалы ауыз сумен қамтамасыз ету мәселелері - ха­лық­тың денсаулығын жақсартудың аса маңызды міндеті, сондықтан бұл біздің басымдығымыз болады.

Сапалы ауыз сумен қамтамасыз ету бойынша жұмыс 8 жыл бұрын бас­тал­ған болатын және оның оң нәти­желері бар.

Орталықтандырылған сумен қам­та­ма­сыз етуге қолжетімділік ауылды елді мекендерде 41 пайызға дейін, қала­лар­да 72 пайызға дейін өсті.

Тасымалы суды пайдаланатын адамдар саны 4 есе азайды.

Сонымен бірге, сумен қамтамасыз ету жүйелерін жақсартуды қажет ететін ауылдар да әлі аз емес.

Қалалардағы сумен қамтамасыз ету жүйелерінің 60 пайызының тозығы жет­кен.

Орташа алғанда республика бойын­ша ауыз суға қолжетімділік деңгейі 2020 жылға қарай 98 пайызды құрауы тиіс, ал судың сапасы белгіленген бар­лық сани­тарлық нормаларға сай болуы керек.

Үкіметке жеке капиталды су ша­руашылығы секторына барынша молы­нан тарту үшін ынталандырудың тиімді жолдарын қарастыруды тап­сыра­мын.

Жерасты суларының әлеуетін кеңі­нен пайдаланып, сумен қамтамасыз ету­дің жаңа нысандарын салу кезінде жүйелі қадамдар жасау керек.

2020 жылға қарай сумен қамтама­сыз етудің орталық желісіне қолжетім­ділік қалаларда 100 пайызды құрауы тиіс.

Ал ауылды жерлерде екі есе артып, 80 пайызға дейін жетуі қажет.

2.7. Табыстардың артуы - өмірдің жаңа сапасы

Құрметті қазақстандықтар!

Үстіміздегі жылы біз зейнетақылар мен стипендиялар көлемін, бюджеттік сала қызметкерлерінің еңбекақыларын 30 пайызға өсіреміз.

Екі жыл қатарынан біз оларды 25 пайызға ұлғайтып келдік.

«Нұр Отан» партиясының Халық­тық тұғырнамасында жоспар­лан­ға­нын­дай, 2012 жылға қарай зейнет­ақы­лар­дың, бюджеттік ұйымдар еңбекақы­лары­ның және стипендиялардың орташа көлемі 2008 жылмен салыстыр­ғанда 2 есе өседі.

Біз бұған уәде бердік, біз мұны орындадық.

Менің тапсырмам бойынша үш жылдық бюджетте сіздерге айтқан индустриялық-инновациялық, сондай-ақ әлеуметтік бағдарламаларды қар­жы­лай қамтамасыз ету қарас­тырылған.

Енді барлығы Үкімет пен жергілікті билік органдарының бұл міндеттерді қалай орындайтынына, бұл жұмыстың қалай ұйымдасты­рыла­тынына байланысты болмақ.

Бұл - таяудағы онжылдықта жа­салуы тиіс жұмыстың ең аз деген мөлшері.

Біз бұл жоспарларды артығымен орындауға ұмтылуға тиіспіз.

Онжылдықтың басты әлеуметтік мақсаты, міне, осында.

Қымбатты қазақстандықтар!

Менің Жарлығыммен 2011 жыл Тәуелсіздіктің 20 жылдығы деп жарияланды.

Мемлекеттік комиссия құрылып, шараның Жалпыұлттық жоспары бекітілді.

Бұл - жалпыхалықтық іс.

Үкіметке оны жүзеге асыруда ин­весторлардың, бизнес-қауымдастық­тары­ның, қазақстандықтардың күшін біріктіруді тапсырамын.

«БЕЙБІТШІЛІК ПЕН ЖАСАМ­ПАЗ­ДЫҚТЫҢ 20 ЖЫЛЫ» - біздің мерейтойымыздың ұраны осы.

Тәуелсіздік жылдарында Қазақстан жолының - БОСТАНДЫҚ, БІРЛІК, ТҰ­РАҚТЫЛЫҚ, ӨРКЕНДЕУ секілді ар­қау­лық құндылықтары қалыптас­ты­рыл­ды.

Қымбатты қазақстандықтар!

Құрметті депутаттар!

Мен үшін және бәріміз үшін Пре­зиденттің өкілеттігін 2020 жылға дейін ұзарту бойынша референдум өткізу ту­ралы жалпыхалықтық бастамаға бай­ла­нысты әжептәуір саяси коллизия қалыптасып отыр.

Мен референдумды қолдап, өзде­рі­нің қолдарын қойған барлық қазақ­стан­дықтарға, сондай-ақ акция бас­та­машыларына шынайы ризашылы­ғым­ды білдіремін.

Халықтың еркін білдіруі толқы­нын­да қаңтардың ортасына қарай Орталық сайлау комиссиясы 5 миллионнан астам адамның қол қойғанын жа­риялады.

Санаулы күндер ішінде референдум туралы бастама іс жүзінде бүкіл­ха­лықтық қозғалысқа айналды.

Осы акция барысында «Нұр Отан» партиясы демократиялық күштердің «Қазақстан-2020» қоғамдық коали­ция­сын құрды.

Халықтық бастама қазақстандық­тардың өшпейтін азаматтық белсенділігін көрсетті.

Ол елдің саяси, интеллектуалдық өмірін белсенділендірді.

Бұл даму мен прогрестің үлкен әлеуеті барлығын айғақтап берді.

Сіздер осы мәселе бойынша бар­лық жағдаяттарды жақсы білесіздер.

Мен өзімнің Жарлығыммен Парла­менттің референдум өткізу туралы ұсы­­­нысын қабылдамай тастадым. Өйт­­кені, 2012 жылғы президенттік сай­лауға қатысуға дайындалып жүрген едім.

Парламент, өзінің конституциялық өкілеттігін пайдаланып, Конституция­ға өзгеріс енгізу туралы Заң қабыл­дады.

Мен заңды Конституциялық Ке­ңес­ке жолдадым, ол оның конститу­ция­лығын айқындауы тиіс.

Тек осыдан кейін шешім қабыл­данатын болады.

Ол Конституция мен біздің заң­дары­мызға сәйкес келуі және халқы­мыздың ұзақ мерзімді мүддесін ескеруі тиіс.

Қалай болғанда да, халықтың еркі - бәрінен жоғары.

Солай дей тұра, мен сыртқы саясатта біз бүкіл әлемдегі инвесторларға, бизнес-қауымдастықтарға міндет­те­ме­ле­ріміздің тұрақтылығын қамтамасыз ететіндігімізді мәлімдеймін.

Біздің саясатымыз барлық әріп­тес­теріміздің үміттері мен күткендеріне сәй­кесетін болады.

Қазақстан Ресей, Қазақстан және Беларусь Кедендік одағын жедел де тиімді дамыту ұстанымында қалады.

Біз ТМД елдерімен ынтымақтас­ты­ғымызды дамытатын боламыз.

Біз еуропалық әріптестерімізге бірлесіп, көпжақты немесе екіжақты пішінде «Қазақстан - ЕО:2020» энер­ге­тикалық хартиясын жасап, қабыл­дауды ұсынамыз.

Бұл Еуропа рыногына энергия ре­сурстарын жеткізу, тұрба құбыры жүйесін дамыту тұрақтылығына кепілдікті қамтамасыз етеді.

Біз осы жылы Алматыда Ауғанстан бойынша арнайы донорлық конференция өткізуге бастамашылық таныт­пақпыз.

Бұдан бұрын мен Каспийдегі тұ­рақ­тылық пактісін қабылдау идеясын ұсынғанмын.

Бұл халықаралық құжат Орталық Азия мен Кавказдың барлық кең байтақ өңірінде тұрақтылықтың берік іргета­сын қалай алады.

Қазақстан ЕҚЫҰ-ға төрағалығы шең­берінде бастаған жанжалдарды реттеу жөніндегі жұмысын жалғастырады.

Біз жаһандық ядролық қауіпсіздік саласында көшбасшы болып қалып отырмыз.

Қазақстан БҰҰ-ға Жалпыға ортақ ядросыз әлем декларациясын қабыл­дау­ды ұсынады.

Сондай-ақ Қырғызстанға көмек­тің мемлекетаралық бағдарламасын жасап, қабылдау маңызды деп са­най­мын.

Үстіміздегі жылы Қазақстан Ислам Конференциясы Ұйымына жетекшілік етеді.

Біз Батыс пен Ислам әлемі үн­қа­ты­суын нығайту бойынша бастама көтердік.

ИКҰ-ға төрағалық Қазақстанның сыртқы саясатының азиялық век­то­рын күшейтуі тиіс.

Үстіміздегі жылдың шілдесінде Аста­нада Шанхай ынтымақтастық ұйы­мының мерейтойлық саммиті өтеді.

ШЫҰ біздің белсенді қаты­суы­мыз­бен құрылған болатын және біз оның нығаюы үшін барлық қажетті нәрсені жасауға тиіспіз.

Мұның барлығы Қазақстанның өңір­лік және жаһандық тұрақ­ты­лық­ты нығайтуға қосқан маңызды үлесі болады.

Қадірлі қауым!

Қымбатты қазақстандықтар!

Таяуда Елбасы өкілеттігін ұзарту үшін бүкілхалықтық референдум өт­кізу туралы бастама көтерілгенін бар­ша­ңыз білесіздер.

Бастамаға үкіметтік емес ұйымдар мен жекелеген азаматтар, зиялы қауым өкілдері мен Парламент депутаттары қолдау білдіруде.

Мен елдің бұл ыстық ықыласын тәуел­сіздікті нығайту, мемлекетті ор­нық­тыру ісіне берген бағасы деп білемін.

Отанды қалтқысыз сүю - оның суы­ғына шыдап, ыстығына күюді талап етеді.

Менің ғұмырым ел тағдырымен еншілес.

Маған Сират көпіріндей қылпылда­ған кезеңде тәуелсіздік алып, мемлекет құру ісі сеніп тапсырылды.

Сондықтан, мен сенімге серт беріп, бар жауапкершілікті мойныма алдым.

Күрмеуі қиын түрлі тағдырлы шешімдерді жүрегімнен өткізіп қабыл­дадым.

Мен 20 жылдан бері бар күш-жіге­рім мен білік, тәжірибемді аямай, хал­қыма қалтқысыз қызмет етіп келемін.

Осы жылдары мәртебемізді көтеріп, мерейімізді асырған барша жетістіктеріміз - біздің ортақ табысымыз.

Сондықтан, бастамашы азаматтар мен тілекші болған барша қазақстан­дықтарға ризашылық білдіремін!

Мен үшін қашанда мемлекет мүд­десі мен ел игілігі жолында қызмет атқарудан артық бақыт болған емес.

Алдымызда атқарылар қыруар істер бар.

Бұл жолда біздің ең басты бай­лығымыз - берекелі бірлігіміз.

Мен ауызбіршіліктен айнымайтын ақжүрек жұртымның қуатты ұлтқа, шуақты ұлысқа айналарына кәміл сенемін.

Халқымызда «Бақ берерде елге ырыс қонады, ұстанған жолы дұрыс болады» деген даналық сөз бар.

Біз бүгінгі Жолдау арқылы мерейлі белестегі атқарған істерімізді қорытын­дылап, болашаққа бағдар жасадық.

Баршаңызға ел игілігі, мемлекет мүд­десі жолындағы абыройлы істерде мол табыс тілеймін!

Мерекелі күндерге жеткізген берекелі тірлігіміз баянды болсын, ағайын!

70) Қазақстан ЕҚЫҰ төрағалығын қабылдайды, болашақ еуропалық қауіпсіздік сәулетіне қатысты үнқатысуды ұйымдастыруды нығайтуға және оны дамытуға тырысатын болады

АСТАНА, 1 қаңтар 2010 жыл – Бүгін Қазақстан ЕҚЫҰ төрағалығын қабылдап, ЕҚЫҰ құндылықтары мен қағидаттарын қалтқысыз ұстануға, барлық мүше-мемлекеттер мүдделерін ескеруге сонымен қатар еуразиялық кеңістіктің қауіпсіздігіне нақты үлес қосатын маңызды үнқатысу алаңы ретіндегі ЕҚЫҰ ролін дамытатындығын растайды.

«Қазақстан Ұйымда төрағалық ететін алғашқы орта азиялық ел және бұрынғы кеңес одағы республикасы. Бұл мүше мемлекеттердің тең құқыққа ие екендігі туралы қағидаттың күшінде екенінің дәлелі, сонымен қатар стратегиялық маңызды өңірде және ЕҚЫҰ кеңістігінде Қазақстан ролінің артуда екенін мойындау болып табылады., - деді ЕҚЫҰ-ның қазіргі төрағасы, Қазақстанның Мемлекеттік хатшысы – Сыртқы істер министрі Қанат Саудабаев.

«ЕҚЫҰ төарағасы ретінде, Қазақстан бейтараптық және үйлесімділік қағидаттары негізінде Венадан Шығыс пен Батысқа созылған ұйымның мүше-мемлекеттер ұстанымын жақындатуға, Ванкувердан Владивастокқа дейінгі кеңістіктегі ынтымақтастықтың нығаюы мен қауіпсіздіктің бекуіндегі Ұйым ролін өсуіне жағдай жасамақ.

Сөзін жалғасытра келе ол: «Қазақстан «Корфу процесін» жалғастырады және ұзақ қақтығыстар өңіріндегі ахуалды тұрақтандыру мен оларды шешудегі, халықаралық көлік дәліздерін дамытудағы, толеранттылық пен өзаратүсіністікті нығайтудағы ЕҚЫҰ жұмыстарына жаңа серпін беруге тырысатын болады. Қазақстан Екінші дүниежүзілік соғыстың аяқталғанына 65 жыл, Хельсинки қорытынды актісіне 35 жыл және жаңа Еуропалық Париж хартиясына 20 жыл толуы қарсаңына келетін ЕҚЫҰ Саммитіне дайындық пен оны ұйымдастыруға қатысты барлық ЕҚЫҰ серіктестерімен белсенді жұмыс жүргізетін болады.»- деді.

Қ. Саудабаев төрағалықты 2009 жылы ЕҚЫҰ-да төраға болған Грекия Премьер-министрі-Сыртқы істер министрі Георгиос Папандреудан қабылдап алды.

«Мен Премьер-министр Георгиос Папандреға ЕҚЫҰ-дағы төрағалық кезіндегі жемісті еңбегі үшін алғысымды білдіргім келеді – деді Қ.Саудабаев. – Сонымен қатар мен Литваны және оның оның Сыртқы істер министрі Вигаудас Ушацкасты Үштікке қатысуымен құттықтағым келеді».

Жаңа төраға Қазақстанның ЕҚЫҰ-дағы төрағалығы кезіндегі басым бағыттары туралы 14 қаңтарда Венада ЕҚЫҰ-ның басты органы болып табылатын Тұрақты кеңес отырысындағы баяндамасында мәлім ететін болады.

2010 жыл біздің мемлекетіміздің өз тәуелсізідігін алғаннан кейінгі ерекше жылдарының бірі деп айтуға толық мүмкіндігіміз бар. Биыл еліміз посткеңестік мемлекеттердің ішінде алғашқы рет Еуропадағы қауіпсіздік және ынтымақтастық жөніндегі ұйымды (бұдан әрі - ЕҚЫҰ) басқаруда. Бұл – Қазақстан Респуб­ликасының әлемдегі беделінің айқын көрінісі. Әлемде мемлекетімізді бүкіл Орталық Азияның көшбасшысы рөлінде және Еуроодақтың өңірдегі шешуші әріп­тесі ретінде таниды. Қа­зақстан ЕҚЫҰ-ның қатысуымен құрылып қойған қауіпсіздік те­тік­терін жаңғыртуды жүзеге асырып отыр.

ЕҚЫҰ төраға­лығы рөліне Қазақ­станның таңдалуы еліміздің мұсылман және еуропалық қо­ғамдастықтар ара­сын­дағы Еуразиядағы көптеген жанжал­дар­ды шешуге нақты көмек көрсетуге қабілеттігі табылды. ЕҚЫҰ Қазақстан қызметінің негізгі мақсаты – біздің елімізді және Орталық Азияның басқа мемлекеттерін әлемдік стандарттар мен дәстүрге баулу, әлемнің Батысы мен Шығысын арасында байланысты нығайту, өңірлік қауіпсіздікті қамтамасыз ету­дегі үлесін, сондай-ақ Ауғаныстан, Ирак ахуалдарын қалпына келтіру жөнін­дегі халықаралық күш-жігерге тұрақты қол­дауын көрсету.

Соңғы жылдары ЕҚЫҰ әскери-саяси және экономикалық бағыттағы қызметтермен емес қадағалаушы функциялармен айналысуда. Қазақстанның осы ұйымға төрағалығынан осы дағдарыстан шығуға мүмкіндік тудырады, болашақ әлемде жаңа жолдарды белсене ұсынады деп те күтілуде. Яғни, ұйым мүшелеріне жетілген сыртқы саяси бастамаларымен өзара түсіністіктің және әділ халықаралық қатынастардың елеулі түрде жаңартылған қағидаттарын қалыптастырады деп сенім артылған.

Қазақстан Республикасының ЕҚЫҰ төрағалығы ретінде тандалуына аймақтың тұрақсыз Ауғаныстанға жақын орналасқандығы, оның қауіпсіздігін қамтамасыз ету — ЕҚЫҰ-ның аз уақытта жүзеге асыру қажет басымдығы екендігі, сондай-ақ оның Орталық Азияның энергетикалық потенциалы екендігі себептігін тигізді. Еліміз бұл ұйымға төрағалығы кезінде Батыс елдері мен ТМД елдері арасындағы қарым-қатынасты бекіте түсу, әлемдік қауіпсіздікті нығайту және Ауғаныстандағы жағдайды тұрақтандыруға бағытталған жұмыстарды атқарды. Республика басшылығы Қазақстанда желтоқсан айында өткізілетін ЕҚЫҰ саммитін де өте маңызды мақсаттар қатарына қосып отыр, өйткені, ол ұйым жұмысына жаңа дем беріп қана қоймайды, сонымен қатар ЕҚЫҰ-ның өз ішіндегі қарама-қайшылықтарды жоюға септігін тигізеді деп үміттенуде.

Қазақстан ЕҚЫҰ-ға төрағалық еткен кезінде Еуропаның энергетикалық қауіпсіздігін қамтамасыз ету мен қауіпсіздіктің жаңа жолдарын барынша ұсынуға, Ауғанстан мәселесінде созылып кеткен жанжалдарды шешуге мән берді. Біздің мемлекетіміз Ресей және Грузия елдерімен жақсы қарым-қатынасы арқасында осы екі мемлекет арасындағы созылып кеткен текетірестерді, Әзірбайжан мен Армения арасындағы Таулы Карабақтағы мәселелерді шешуге ұмтылыс жасап, аталмыш әрекеттердің оңды нәтижеге әкелгендігін де айтып кеткен орынды. Атап айтқанда, ЕҚЫҰ іс басындағы төрағасы, Мемлекеттік хатшы - Сыртқы істер министрі Қанат Саудабаев Вена, Брюссель, Лондон, Вашингтон, Нью-Йорк, Женева, Тбилиси, Баку мен Ереванда бірқатар келіссөздер жүргізіп үлгерді, Астанада Түркия, Ресей сыртқы істер министрлерін қабылдады. Осы арқылы ЕҚЫҰ саммитіне дайындыққа қатысты көптеген негізгі уағдаластықтарға, халықаралық ұйымдармен өзара ықпалдастыққа, ЕҚЫҰ кадр мәселелері бойынша бірқатар жайттардың шешілуіне қол жетті. Қазақ төрағалығының ең басты ерекшеліктерінің бірі - барлық қатысушы мемлекеттермен кеңесу жүйесін қалыптастыра алуында.

ЕҚЫҰ басқаруда еліміз ең алдыменен келісім қағидасын қолданып отыр. Қазақстан өз төрағалығы барысында ұйымның беріктілігін және жан-жақты тиімділігін арттыруға, қазіргі заманғы қауіп-қатерлерге төтеп беру қабілетін күшейтуге де бағытталған іс-әрекеттерді жүзеге асыруда. Еліміздің басшысымен ұстанған мақсаты - ЕҚЫҰ эволюциялық дамуына қолайлы жағдай жасау, оның әлеуетін жетілдіру, мандатын нығайту, әлем қауіпсіздігін барынша нығайту. Осыған сәйкес, біздің мемлекетпен ЕҚЫҰ-ның болашағына байланысты жаңаша көзқарас қарастырылуы ұсынылуда. Ұйымның негізгі құжаттары 1975 жылы (Хельсинки актісі), 1990 жылы (Париж хартиясы), 1999 жылы (Еуропалық Қауіпсіздік туралы Стамбул хартиясын) қабылданған. ЕҚЫҰ тарихына сүйеніп, әрбір он жыл сайын форумды трансформациялау қажеттігін пайымдаймыз.

Кез келген мемлекеттің қауіпсіздігін, оның өркенделуінің, өсіп-өнуі мен тұрақтылығының басты кепілі мен игілігі демократия табылады. Демократия біздің түсінігімізше халық санасында тереңдеп тамырын жайып үлгерген бір мезетте өзгертуге бағынбайтын қоғамдық менталитетке жататын ұғым. Ел басшылығы Қазақстанның ЕҚЫҰ және оның институттарының адам құқығы мен демократия саласындағы мандатын толық жүзеге асуына болысатынын бірнеше мәрте мәлімдеді. Биылғы жылғы ЕҚЫҰ аясында атқарылар іс-шаралардың бірегейі - маусым айында Астана қаласында демократиялық ұстанымды насихаттау мақсатында жоғары деңгейдегі толеранттылық пен кемсітпеушілік жөніндегі іс-шара (конференция) өткізілді.

Қа­зақстан төрағалығының аса ма­ңызды ісінің бірі ретінде лаңкес­тікке қарсы жұмылуға бүкіл әлем назарын аудару, тек әскери-саяси ғана емес, экономикалық-экологиялық, гуманитарлық шара­лар кешенін кеңінен қолдану қажет тұжырымдамасын қолдану. Мемлекетіміз лаңкестікке, трансұлттық сипаттағы қауіпсіздік қатерлеріне қарсы қаруды ғана емес, бейбіт тетіктерді де кең пайдалану қажеттілігін пайымдайды. Қа­зақстанда лаңкестік орын ала­тындай күр­делі мәселелер, ал­ғы­шарттар жоқ деп айтуға болады. Ішкі саяси жағ­дайдың тұрақтылығы, экономиканың өр­леу деңгейі оның дәлелі. Дегенмен, Қазақстанға лаңкестік сырттан енуі мүмкін. Ресми мәліметтер бойынша жекелеген халықаралық лаңкестер ұйым­дары немесе топтардың біздің азаматтарды өздеріне тарту, үгіт-насихат жүргізу деректері бар. Әсіресе, діни экстремизм, әртүрлі уағыз жастардың кейбірін адастыруы ықтимал. Қазақстанда адамдардың өмір сүру деңгейі жоғары. Тұрмысы төмен жандарға мемлекет жет­кілікті жәрдем береді. Жұмыс­сыздық азайып келеді. Демек, «көрінген көк аттының» аран­датушылық, іріткі салу мақсатын­дағы сөздеріне еруге себеп жоқ. Лаңкестікке қарсы күрес – әлем елдерін ынтымақтастық­қа шақырып отыр және осы насихаттың бастамашыларының бірі ретінде Қазақстан да табылып отыр. Осы насихатты уағыздау ЕҚЫҰ тарихында 11-жылдан бері бірінші рет өткізілетін желтоқсан саммитінің басты мақсаттарының бірі.

ЕҚЫҰ жетоқсан cаммитінің күн тәртібінде ең алдымен Еуропадағы, содан соң бүкіл әлемдегі қауіпсіздікті бірлесіп сақтау, соның ішінде трансұлттық қауіп-қатермен қатар экономикалық және экологиялық қауіпсіздік жүйесінің шаралары қаралады.

Қазақстан ЕҚЫҰ тізгінін ұстасымен саяси-әске­ри, экономикалық-экология­лық және адамдық өлшемдер мәсе­лелері­не бірдей араласуға күш салды. Сондай-ақ, осы лауазымды иелену кезінде экономикалық-эколо­гиялық 18-ші форумды өткізу­ге ұйтқы бол­ып, күн тәрті­біне «Шекаралық қиылыс бекет­те­рінде жердегі көліктерді бас­қару қауіпсіздігін арттыру және халықаралық ав­токөлік пен те­міржол қатынас­та­рын ЕҚЫҰ ай­мағында жеңілде­ту туралы» та­қырып ұсынды. Ұйым мүшелерінің келісуімен біздің мемлекетіміздің басшысымен шартты түрде «Маас­трихт қосу» деп аталған жаңа құжат желтоқсан саммитінде қаралуы мүмкін.

Жалпы, Қазақстан Республикасының ЕҚЫҰ төрағалығы әлемдік қауымдастық алдында саяси салмақ пен бедел алып келеді. Тәуелсіздігіміздің алғашқы жылдарынан-ақ Елбасымыздың сыртқы саясаты белсенді дипломатиялық іс-әрекетіне негізделіп келді, соның ішінде ең басты назар айналамыздағы аймақтарға көбірек көңіл бөлінді. Алда ЕҚЫҰ саммиті кезінде еуроатлантикалық және еуразиялық кеңістіктегі саяси тұрақтылыққа бағытталған бүкіл ғалам үшін қажетті шешімдер қабылдауға мүмкіндік тудыратыны сөзсіз. ЕҚЫҰ кеңістігіндегі тұрақтылық пен бейбіт өміріне біздің халықтарымыздың қауіпсіздігі мен әл-ауқаты тікелей байланысты. Сондай-ақ, осы саммит жұмысы барысында біздің еліміздің төрағалығына баға беріледі және біз Қазақстан төрағалығына оң баға беріледі деп сенеміз.