Этнакультурныя аспекты традыцыйнага адзення

Date: 2015-10-07; view: 1194.

Маларыцкі майстар. Нараджэнне Маці Боскай. 1648-1650.

Традыцыйнае беларускае адзенне, асабліва жаночы строй, багатае этнакультурным зместам. Адзенне, якое сумяшчае утылітарны, мастацкі, знакава-сімвалічны элементы, у найбольшай ступені, параўнальна з іншымі відамі матэрыяльнай культуры, сінтэзуе розныя бакі культуры этнасу.

Традыцыйнае адзенне амаль цалкам саматужна выраблялася са сваёй сыравіны і, пераважна, – жанчынамі. Адзенне рабілася з ільну, валокан канопляў, жывёльнай скуры, воўны. Шлях да гатовага вырабу быў досыць працяглы і ўлучаў шэраг паслядоўных аперацый. Так, сцябліны льну ці канаплі спачатку мачылі, потым мялі на спецыяльнай мялцы, трапалі, часалі грэбнямі і шчоткамі, а толькі потым пачыналі прасці – на адмысловай дошцы ці на калаўроце з колам. Пражу намотвалі на матавіла, сушылі, почасту – бялілі, снавалі і нарэшце пачыналі ткаць.

Фарбавалі самі. Варта адзначыць, што да з'яўлення фабрычных тэхналогій у летнім адзенні беларусаў пераважалі натуральныя белыя колеры; тое ж тычылася і зімовай вопраткі. Воўнавую тканіну на андаракі, нагавіцы, камізэлькі традыцыйна фарбавалі. Да рамеснікаў звярталіся, калі трэба было вырабляць верхняе адзенне, якасныя віды абутку, пэўнае формы галаўныя уборы.

Традыцыйная вопратка падзяляецца на мужчынскую і жаночую (праблемным падаецца дзіцячы камплект), сезоннную, будзённую і святочную (тут можна вылучыць абрадавае адзенне – напрыклад, маладое, свахі, свата). Дарослы чалец сям'і меў некалькі камплектаў вопраткі: святочную, а таксама будзённую для кожнай паравіны году. Гэта тычылася і такіх складаных да вырабу рэчаў, як кажух і світка, якія таксама прызначаліся для працы і святаў.

Найбольш ярка характарыстычныя рысы традыцыйнага беларускага адзення выявіліся ў жаночым строі. Аснову традыцыйнага адзення склала вопратка нацельная, сподняя, найперш – і ў жанчын, і ў мужчын – кашуля. У жанчын летні строй дапаўняўся спадніцай, хвартухом, кароткай камізэлькай (ці вопраткай з рукавамі), галаўным уборам і абуткам. Гэты комплекс мае поліэтнічны, усходнеславянскі характар; этнічныя ягоныя асаблівасці вызначаюцца, перадусім, кроем. Адзін з найбольш істотных элементаў традыцыйнага строю – кашуля (сарочка, рубаха). Найбольш старажытным відам крою лічыцца тунікападобны – калі палатно складалі напалам, пасярэдзіне рабілі выраз для галавы, паніжаючы яго спераду бліжэй да грудзей, і пакідалі адтуліны для рук. Гэты крой шырока вядомы ў старажытнасці народам Еўропы, у тым ліку, і памежным балтам. Аснову традыцыйнай, з'яўленай у пазнейшы час кашулі, складала “станіна” – адмыслова злучанае на плячах палатно. У будзённых кашулях верх шылі з больш вытанчанага палатна, ніз – з грубага. Найбольш традыцыйным, а значыць і старажытным, спосабам злучэння было ўшыванне прастакутніх уставак на плячах. Гэты тып кашулі таксама ўласцівы ўкраінцам, рускім. Каўнярамі на кашулях былі пераважна невысокія стойкі, хаця рабіліся таксама і адкладныя. Як лічаць даследчыкі, шырокі адкладны каўнер (часцей – у кашулях) атрымаў папулярнасць у літоўцаў, беларусаў, украінцаў, а таксама, часткова, у рускіх, з польскім уплывам. Можна меркаваць, што пачатак гэтага працэсу належыць да часоў Рэчы Паспалітай. Рукавы рабіліся, як магчыма меркаваць, найчасцей з манжэтамі, акрамя, хіба, працоўных кашуляў. Традыцыйная беларуская кашуля даўжыню мела зазвычай ніжэйшую за калена. Упрыгожвалі яе досыць сціпла: арнамент размяшчалі ў верхняй частцы рукава, на паліках, каўняры, грудзях, манжэтах, але суцэльны ўзор скарыстоўвалі дастаткова рэдка – прынамсі, мяркуючы з таго, што было характэрна ў больш позні час у рэгіёнах, памежных з Украінай. Упрыгожванне мела манахромны характар – пераважна арнамент чырвонага і чорнага колераў, а больш старажытныя кашулі маглі быць наагул без аздобы.

Асноўная паясная вопратка жаночага строю – спадніца. Яна шылася з даматканага палатна, сукна ці паўсукна. Спадніца рабілася з некалькіх (да шасці) полак (падоўжаных кавалкаў палатна), сшытых і прызбораных ля поясу. Зрэдку спадніцу шылі з папярэчнага кавалку тканіны – папярэчкі. Спадніца завязвалася спераду ці крыху збоку тасёмкамі ці паяском. Вылучаюцца спадніцы, якія шыліся з ваўнянай ці паўваўнянай тканіны – андаракі (слова паходзіць з нямецкай мовы). У старажытнасці андаракі ў якасці верхняй спадніцы насілі прадстаўніцы паноўных класаў. Андарак багата ўпрыгожвалі, і асаблівасцю ягонай ёсць клеткавы арнамент. Спадніца з пакупной ці даматканай, пераважна – ваўнянай, тканіны, найчасцей аднатонна пафарбаванай – называлася саянам. У старажытнасці такія ўборы насіла шляхта. Саянам называлі таксама і вопратку, утвораную шляхам сшывання ліфу і спадніцы.

Да старажытнага віду паяснога адзення належыць панёва – нясшытая ці, радзей, сшытая спадніца кшталту андараку. Магчыма, на нашых землях расхінная панёва папярэднічала андараку. Паверх спадніцы заззвычай павязваўся хвартух (поняўка), які прымацоўваўся на стане паўразамі. Рабілі яго з адной, дзвюх, зрэдку – трох, полак, і даўжыня ягоная ў беларусак амаль супадала з даўжынёю спадніц. Такія даўгія – роўныя са спадніцамі хвартухі апранутыя на пакаёўках на абразе “Нараджэнне Маці Боскай” Маларыцкага майстра (1648 – 1650 гг.; гл. у пачатку параграфа). Паказальна, што на згаданай выяве хвартухі не арнаментаваныя – адзін натуральна белага колеру, другі, хутчэй за ўсё, пафарбаваны, хаця ў пазнейшы час іх зазвычай аздаблялі, найчасцей – гарызантальнай арнаментыкай – па ніжнім краі, альбо і трохі вышэй. У верхняй частцы хвартух дробна прызборваўся, што бачна на іканапіснай выяве. Беларускія хвартухі тыпалагічна блізкія да пярэднікаў прыбалтаў, палякаў, што робіць гэты від адзення часткай поліэтнічнай культуры.

Яшчэ адзін від адзення, уласцівы беларусам, а таксама заходнім суседзям, – камізэлька. Гэта было досыць каштоўнае адзенне, і, згодна з пазнейшымі этнаграфічнымі дадзенымі, магло перадавацца ў спадчыну. У Беларусі яно мела назву “кабат”, “шнуроўка”, “гарсэт”, “безрукаўка” ды іншыя. Камізэлькі часцей шылі з пакупнога сукна яркай расфарбоўкі. Найбольш просты і, магчыма, старажытны іх крой – з простай спінкай, калі задняя частка рабілася з суцэльнага кавалку матэрыялу. Камізэлькі на Беларусі мелі даўжыню да стану і ніжэй – заходзілі за верхнюю частку спадніцы. Доўгія камізэлькі знізу разрэзваліся і абшываліся. Зазвычай суцэльны разрэз рабілі спераду, і ён зашнуроўваўся ці зашпіляўся на самаробныя гузікі, на грудзях утваралі выраз – круглай ці геаметрычна-вуглавой формы. Камізэлька ўпрыгожвалася вышыўкамі, нашыўкамі з найлепшых нітак.

Наагул традыцыйнае беларускае жаночае адзенне характарызавалася арнаментальнай стрыманасцю, натуральным колерам; беларускі жаночы строй пазнавальна адрозніваецца ад рускага, з сарафанам і какошнікам, а таксама ад украінскага, з кароткімі спадніцамі і багатага на ўпрыгожанні – пацеркі ды істужкі.

Верхняе адзенне вясковай жанчыны не надта каб вылучалася своеасаблівасцю: як і ў мужчын, гэта былі сярмяга і кажух, якія ўзгадваюцца ў актах ХVІІ—ХVІІІ стст. і якія рабіліся з хатніх матэрыялаў – сукна, палатна, аўчыны, адмыслова апрацаваных і пашытых краўцамі. Гэтая вопратка не мела падкладкі, магла зашпіляцца на драўляныя гузікі, гаплікі, альбо проста падпаясвацца. Найбольш пашыраным відам адзення была світа (сярмяга) – зробленая зазвычай з сукна доўгае расхінастае адзенне з рукавамі, разрэзам спераду і адкладным каўняром. Найбольш былі пашыраныя світы простага халатападобнага крою, хаця, як магчыма выснаваць з дадзеных другой паловы ХІХ ст., існавалі і іншыя: прыстаненая з бакавымі клінамі – “вусамі”, у зборкі, з фалдамі. Гэткага ж кшталту світы вядомыя таксама ўкраінцам, рускім, літоўцам, палякам. Світа мела белы ці шэры, зрэдзь часу – чорны колер (больш уласцівыя для шляхты), упрыгожвалі яе сціпла.

Іншае верхняе адзенне – кажух, прыкладам, – рабілася ў старажытнасці з нядубленых белых аўчын. Найбольш пашыраны быў на Беларусі кажух простага крою, мадыфікацыі яго адпавядалі крою світкі; адрозна ад пазнейшых часоў, старажытны кажух быў даўгім. Менш распаўсюджанае было верхняе палатнянае адзенне – насоў, балахон, якое апраналі на кашулю ўлетку ці ўвосень.

Істотнае месца ў традыцыйным строі займалі галаўныя ўборы. Яны таксама падзяляліся на сезонныя, святочныя і будзённыя і адрозніваліся залежна ад полу, сямейнага становішча ды ўзросту. Тыпалагічна вызначальным для ўбору было сямейнае становішча: на непакрытых валасах, косах – вянок (на цвёрдай драўлянай аснове, абшытай палатном; улетку – кветкавы), а таксама галаўная павязка, зазвычай завязаная вузлом на патыліцы, былі адзнакамі дзяўчыны. На святы ў косы ўпляталі болей рознакаляровых істужак, а вянкі лепей аздаблялі. Тут асобна трэба вылучыць вясельны вянок, які – з азначэння ў другой палове ХVІІІ ст. Е. Кітовіча – да пачатку гэтага стагоддзя быў часткай рытуалу і для прадстаўнікоў заможнага саслоўя. Пасля шлюбу галаўны ўбор і ўчасанне жанчына змяняла: косы распляталі, валасы закручвалі над вушамі ці на абшытыя палатном кудзелю, альбо галінкі дрэваў і ўкладалі вакол галавы.

Адзін з найбольш старажытных жаночых галаўных убораў беларусак, а таксама ўкраінак, рускіх, прыбалтак – намітка: ручніковы галаўны ўбор з тонкага палатна значнай даўжыні (2—3 метры, часам – да 5!), што павязваўся на чапец (яшчэ таксама – на цвёрдую аснову) так, каб адзін альбо абодва ягоныя даўгія канцы спускаліся на спіну. Адны з найбольш старажытных узораў галаўных убораў, што нагадваюць наміткі, заўважныя на вядомай іконе Пятра Яўсяевіча “Нараджэнне Маці Боскай” (1649 г.): у намітках – св. Ганна і служанкі. Прыкметныя і папярэчныя чырвоныя і цёмныя палосы на гэтых намітках. У служанкі, што стаіць па цэнтры на пярэднім плане іконы, намітка павязаная на авальную абручападобную аснову – хутчэй за ўсё, галаўны ўбор – тып чапца з авальным верхам, вузкім аколышкам і завязкамі ззаду. Падобныя ўборы, што нагадваюць намітку, сустракаюцца і на пазнейшых абразах – напрыклад, у творы з Магілёўшчыны канца 1700 г., на якім бачны галаўны ўбор без упрыгожання.

Акрамя намітак, беларускія жанчыны насілі ў старажытнасці чапцы – згаданыя вышэй з круглым верхам, аколышкам і завязкамі ззаду, і глыбокія, з завязкай пад падбародак (“каптур”). Існавалі і арыгінальныя, рагатыя, галаўныя ўборы, зробленыя на цвёрдай аснове і абвязаныя палатном (старажытны тып – “пушанка”).

Падобным да мужчынскага быў і жаночы абутак. Асноўным відам яго былі плеценыя з лыка ліпы, лазы, бяросты, пянькі ці скураныя лапці. Існуе меркаванне, што найбольш старажытнымі былі лапці простага пляцення. Лапці абуваліся на анучы – летнія ці зімовыя, мацаваліся вяроўкамі-аборамі. Найбольш просты тып лапцей – без галовак і запятак, дзе іх замянялі лыкавыя петлі і прыстасаванні для мацавання абораў. Вядомы і скураныя лапці (пасталы), але шырокага распаўсюду яны не набылі. Акрамя лапцей, насілі скураныя паўбоцікі на абцасах (чаравікі), але гэта быў дарагі абутак. Таксама заможныя сяляне маглі здабыць валёнкі. Як досыць рэдкі від абутку можна вылучыць драўляны – цалкам з дрэва ці са скураным верхам.

Традыцыйнае мужчынскае адзенне беларусаў вызначалася меншай разнастайнасцю, чымся жаночае. Параўнальна з жаночай, мужчынскія кашулі ўпрыгожваліся сціпла.

Мужчынскія порткі (нагавіцы, ганавіцы) рабіліся з палатна (на лета), сукна (каб насіць узімку) не надта добрага гатунку. Беларускія нагавіцы былі параўнальна не шырокімі, іх адрознівала рамбавідная форма ўстаўкі паміж штанінамі, хаця мелі месца і ўстаўкі іншай формы – трохвугольнай, круглай, трапецыявіднай, і трымаліся на шнурку, што ўсоўваўся праз абшыўку ў верхняй частцы. Суконныя нагавіцы маглі зашпіляцца на адзін ці два гузікі з косткі, скуры, кавалачка дрэва і не мелі кішэняў.

Абавязковай прыналежнасцю мужчынскага строю быў пояс (пас) – старажытны плецены ці тканы. На поясе вісела невялічкая торбачка – каліта (адсюль і назва гаманца – калітка), у якой захоўваліся грошы, тытунь, люлька, крэсіва, нож (мог вісець і асобна). Сяляне таксама насілі скураныя рамяні, якімі падпаясвалі світкі (здаўна згадваюцца ў актах ХVІ – ХVІІ стст.). Беларускія мужчыны насілі камізэлькі (жупаны, жупіцы).

Мужчынскія світа і кажух па сваіх відавых асаблівасцях мала адрозніваліся ад жаночых. Гэтага нельга сказаць пра галаўныя уборы – з воўны, футра, сукна, саломы. Традыцыйны летні галаўны ўбор – плецены з саломы (радзей – з лазы, чароту) шырокапольны капялюш з тулляй (брылём). Са старажытных актаў вядомыя магеркі – валяныя шапкі з палямі, што прылягалі да туллі, а таксама валяныя брылі ды іншыя. Старадаўнія зімовыя шапкі шыліся з футра вавёркі, лісы, зайца, а таксама з аўчыны футрам навонкі. Найбольш старажытныя, з аўчыны, былі высокімі, цыліндрычнай, конусападобнай формы – кучмы (кучомкі). Зімовая шапка падкрэслена вялікіх памераў называлася капузай. Скарыстоўвалася і футравая шапка, абшытая зверху сукном, з вушамі – малахай. Досыць даўняю ёсць пашытая, зазвычай – з аўчыны, аблавуха – шапка з вушамі па баках спераду і ззаду (яны падвязваліся зверху).

Мужчынскі абутак складалі лапці (такія ж, як і ў жанчын), боты (рэдкі, пераважна мужчынскі абутак), валёнкі.